לַמְנַצֵּחַ לִבְנֵי־קֹרַח מִזְמוֹר׃
Lamnatséaʹh livné-koraʹh mizmor
רָצִיתָ יְהוָה אַרְצֶךָ שַׁבְתָּ שבות [שְׁבִית] יַעֲקֹב׃
Ratsita Ado-naï artsékha chavta chévite yaʹakov
נָשָׂאתָ עֲוֺן עַמֶּךָ כִּסִּיתָ כָל־חַטָּאתָם סֶלָה׃
Nasata ʹaone ʹamékha kisita khole-ʹhatatame séla
אָסַפְתָּ כָל־עֶבְרָתֶךָ הֱשִׁיבוֹתָ מֵחֲרוֹן אַפֶּךָ׃
Asafta khole-ʹèvratékha héchivota méʹharone apékha
שׁוּבֵנוּ אֱלֹהֵי יִשְׁעֵנוּ וְהָפֵר כַּעַסְךָ עִמָּנוּ׃
Chouvénou élohé ychʹénou véhafèr kaʹaskha ʹimanou
הַלְעוֹלָם תֶּאֱנַף־בָּנוּ תִּמְשֹׁךְ אַפְּךָ לְדֹר וָדֹר׃
Halʹolame téénafe-banou timchokh apékha lédor vador
הֲלֹא־אַתָּה תָּשׁוּב תְּחַיֵּנוּ וְעַמְּךָ יִשְׂמְחוּ־בָךְ׃
Halo-ata tachouv téʹhayénou véʹamékha yisméʹhou-vakh
הַרְאֵנוּ יְהוָה חַסְדֶּךָ וְיֶשְׁעֲךָ תִּתֶּן־לָנוּ׃
Harénou Ado-naï ʹhasdékha véyèchʹakha titène-lanou
אֶשְׁמְעָה מַה־יְדַבֵּר הָאֵל יְהוָה כִּי יְדַבֵּר שָׁלוֹם אֶל־עַמּוֹ וְאֶל־חֲסִידָיו וְאַל־יָשׁוּבוּ לְכִסְלָה׃
Èchméʹa ma-yédabèr haèle Ado-naï ki yédabèr chalome el-ʹamo véèl-ʹhasidav véal-yachouvou lékhisla
אַךְ קָרוֹב לִירֵאָיו יִשְׁעוֹ לִשְׁכֹּן כָּבוֹד בְּאַרְצֵנוּ׃
Akh karov liréav yichʹo lichkone kavode béartsénou
חֶסֶד־וֶאֱמֶת נִפְגָּשׁוּ צֶדֶק וְשָׁלוֹם נָשָׁקוּ׃
ʹHésède-véémète nifgachou tsédèk véchalom nachakou
אֱמֶת מֵאֶרֶץ תִּצְמָח וְצֶדֶק מִשָּׁמַיִם נִשְׁקָף׃
Éméte méérèts titsmaʹh vétsédèk michamayime nichkafe
גַּם־יְהוָה יִתֵּן הַטּוֹב וְאַרְצֵנוּ תִּתֵּן יְבוּלָהּ׃
Game-Ado-naï yitène hatov véartsénou titène yévoula
צֶדֶק לְפָנָיו יְהַלֵּךְ וְיָשֵׂם לְדֶרֶךְ פְּעָמָיו׃
Tsédèk léfanav yéhalèkh véyasème lédérèkh péʹamav