לַמְנַצֵּחַ שִׁיר מִזְמוֹר הָרִיעוּ לֵאלֹהִים כָּל־הָאָרֶץ׃
Lamnatséaʹh chir mizmor hariʹou lélohime kole-haaréts
זַמְּרוּ כְבוֹד־שְׁמוֹ שִׂימוּ כָבוֹד תְּהִלָּתוֹ׃
Zamérou khévode-chémo simou khavode téhilato
אִמְרוּ לֵאלֹהִים מַה־נּוֹרָא מַעֲשֶׂיךָ בְּרֹב עֻזְּךָ יְכַחֲשׁוּ לְךָ אֹיְבֶיךָ׃
Imrou lélohime ma-nora maʹasékha bérov ʹouzékha yékhaʹhachou lékha oyvékha
כָּל־הָאָרֶץ יִשְׁתַּחֲווּ לְךָ וִיזַמְּרוּ־לָךְ יְזַמְּרוּ שִׁמְךָ סֶלָה׃
Kole-haaréts yichtaʹhavou lékha vizamérou-lakh yézamérou chim-kha séla
לְכוּ וּרְאוּ מִפְעֲלוֹת אֱלֹהִים נוֹרָא עֲלִילָה עַל־בְּנֵי אָדָם׃
Lékhou ourou mifʹalote Élo-him nora ʹalila ʹal-béné adame
הָפַךְ יָם לְיַבָּשָׁה בַּנָּהָר יַעַבְרוּ בְרָגֶל שָׁם נִשְׂמְחָה־בּוֹ׃
Hafakh yame léyabacha banahar yaʹavrou véraguèl chame nisméʹha-bo
מֹשֵׁל בִּגְבוּרָתוֹ עוֹלָם עֵינָיו בַּגּוֹיִם תִּצְפֶּינָה הַסּוֹרְרִים אַל־ירימו [יָרוּמוּ] לָמוֹ סֶלָה׃
Mochèl biguvourato ʹolame ʹénav baguoyime titspéna hasorrime al-yaroumou lamo séla
בָּרְכוּ עַמִּים אֱלֹהֵינוּ וְהַשְׁמִיעוּ קוֹל תְּהִלָּתוֹ׃
Barkhou ʹamime élo-hénou véhachmiʹou kol téhilato
הַשָּׂם נַפְשֵׁנוּ בַּחַיִּים וְלֹא־נָתַן לַמּוֹט רַגְלֵנוּ׃
Hasame nafchénou baʹhayime vélo-natane lamote ragulénou
כִּי־בְחַנְתָּנוּ אֱלֹהִים צְרַפְתָּנוּ כִּצְרָף־כָּסֶף׃
Ki-véʹhantanou Élo-him tséraftanou kitsrafe-kasèfe
הֲבֵאתָנוּ בַמְּצוּדָה שַׂמְתָּ מוּעָקָה בְמָתְנֵינוּ׃
Havétanou vamétsouda samta mouʹaka vématnénou
הִרְכַּבְתָּ אֱנוֹשׁ לְרֹאשֵׁנוּ בָּאנוּ־בָאֵשׁ וּבַמַּיִם וַתּוֹצִיאֵנוּ לָרְוָיָה׃
Hirkavta énoche lérochénou banou-vaèche ouvamayime vatotsiénou larvaya
אָבוֹא בֵיתְךָ בְעוֹלוֹת אֲשַׁלֵּם לְךָ נְדָרָי׃
Avo vètkha véʹolote achalème lékha nédaraï
אֲשֶׁר־פָּצוּ שְׂפָתָי וְדִבֶּר־פִּי בַּצַּר־לִי׃
Achère-patsou séfataï védibèr-pi batsar-li
עֹלוֹת מֵחִים אַעֲלֶה־לָּךְ עִם־קְטֹרֶת אֵילִים אֶעֱשֶׂה בָקָר עִם־עַתּוּדִים סֶלָה׃
ʹOlote méʹhime aʹalé-lakh ʹime-kétorète élime éʹésé vakar ʹime-ʹatoudime séla
לְכוּ־שִׁמְעוּ וַאֲסַפְּרָה כָּל־יִרְאֵי אֱלֹהִים אֲשֶׁר עָשָׂה לְנַפְשִׁי׃
Lékhou-chimʹou vaasapéra kole-yiré Élo-him achère ʹasa lénafchi
אֵלָיו פִּי־קָרָאתִי וְרוֹמַם תַּחַת לְשׁוֹנִי׃
Élav pi-karati véromame taʹhate léchoni
אָוֶן אִם־רָאִיתִי בְלִבִּי לֹא יִשְׁמַע אֲדֹנָי׃
Avène ime-raiti vélibi lo yichmaʹ ado-naï
אָכֵן שָׁמַע אֱלֹהִים הִקְשִׁיב בְּקוֹל תְּפִלָּתִי׃
Akhène chamaʹ Élo-him hikchiv békol téfilati
בָּרוּךְ אֱלֹהִים אֲשֶׁר לֹא־הֵסִיר תְּפִלָּתִי וְחַסְדּוֹ מֵאִתִּי׃
Baroukh Élo-him achère lo-hésir téfilati véʹhasdo méiti